“ဗုဒ္ဓံသရဏံဂစ္ဆာမိ”သီချင်းကို DJ သံစဉ်ဖြင့်ဖွင့်ခဲ့သည့် မန္တလေး Cover clubချိတ်ပိတ်ခံရ၊ DJ Violet သင်္ဃန်းကျွန်းသံဃနာယကအဖွဲ့ထံ တောင်းပန်
မန္တလေးမြို့ရှိ Cover ကလပ်တွင် “ဗုဒ္ဓံသရဏံဂစ္ဆာမိ” ဓမ္မတေးကို DJ သံစဉ်ဖြင့် တီးခတ်မှုကြောင့် အဆိုပါကလပ် ချိတ်ပိတ်ခံရပြီး၊ ယင်းသီချင်းကို ဖန်တီးခဲ့သူ မခင်ထွေးထွေးမွန် (DJ Violet) က သင်္ဃန်းကျွန်းမြို့နယ် သံဃနာယကအဖွဲ့ထံ ဝန်ချတောင်းပန်ခဲ့ကြောင်း သိရသည်။
ပြီးခဲ့သည့် ဇူလိုင် ၃၁ ရက်ညပိုင်းက မန္တလေးမြို့၊ မဟာအောင်မြေမြို့နယ်ရှိ Cover ကလပ်တွင် DJ Violet က ၎င်းဖန်တီးထားသည့် “ဗုဒ္ဓံသရဏံဂစ္ဆာမိ”ကို DJ သံစဉ် Beatများဖြင့် ဖွင့်သည်။ ထိုရုပ်သံဖိုင် လူမှုကွန်ရက်ပေါ် ပျံ့နှံ့လာပြီးနောက် သာသနာညှိုးနွမ်းစေမှုဖြစ်၍ အရေးယူရန် လိုအပ်ကြောင်းကို ဝေဖန်ခဲ့သည်။
ယင်းဖြစ်စဉ်ကြောင့် စက်တင်ဘာ ၁၁ ရက်ညပိုင်းတွင် Cover ကလပ်ကို စီးနင်းကာ ဝန်ထမ်း ၈ ဦးကို စစ်ဆေးရန် ထိန်းသိမ်းခဲ့ပြီး၊ ဆိုင်ကိုလည်း ချိတ်ပိတ်ခဲ့ကြောင်း သိရသည်။ ဖြစ်စဉ်နှင့်ပတ်သက်၍ DJ Violet က စက်တင်ဘာ ၁၁ ရက်နေ့တွင် ရန်ကုန်၊ သင်္ဃန်းကျွန်းမြို့နယ် သံဃနာယကအဖွဲ့ထံ သွားရောက်ဝန်ချတောင်းပန်ခဲ့ပြီးနောက် ဆရာတော်ငါးပါးကလည်း “ရဟန်းရှင်လူပြည်သူများကိုယ်စား ခွင့်လွှတ်ပါကြောင်း” လက်မှတ်ထိုး ထုတ်ပြန်ခဲ့သည်။
“ကျွန်မကိုယ်တိုင်က ဗုဒ္ဓဘာသာဖြစ်နေပါလျက်နဲ့ သတိမပြုမိဘဲ လုပ်မိတဲ့အမှားအတွက် အားလုံးကို အနူးအညွန့် တောင်းပန်ပါတယ်။ နောက်အဲဒီလိုအမှားမျိုး မဖြစ်အောင် ဆင်ခြင်ပါ့မယ်” ဟု DJ Violet က ၎င်း၏လူမှုကွန်ရက်စာမျက်နှာတွင် ရေးသားထားသည်။
ထို့ပြင် ၎င်း၏ဝန်ချတောင်းပန်စာတွင် ဘာသာရေးဆိုင်ရာနှင့်ပတ်သက်ပြီး အကျွမ်းတဝင်မရှိမှုကြောင့် ပျော်ပွဲရွှင်ပွဲတွင် သီဆိုကခုန်မိခဲ့ကြောင်း၊ ဗုဒ္ဓဘာသာဝင်တို့၏ စိတ်နှလုံးကို ထိခိုက်စေခဲ့မိသည့်အတွက် စိတ်မကောင်းဖြစ်ရကြောင်းလည်း ဖော်ပြထားသည်။
