ရန်ကုန်တိုင်းသဘင် လူမှုကူညီစောင့်ရှောက်ရေး ရန်ပုံငွေ သဘင်၊ ရုပ်ရှင်၊ ဂီတ ပဒေသာကပွဲကြီး ကျင်းပ
မြန်မာနိုင်ငံ သဘင်အစည်းအရုံး ရန်ကုန်တိုင်းသဘင်က ဦးစီးဆောင်ရွက်တဲ့ ရန်ကုန်တိုင်း သဘင် လူမှုကူညီစောင့်ရှောက်ရေး ရန်ပုံငွေ သဘင်၊ ရုပ်ရှင်၊ ဂီတ ပဒေသာကပွဲကြီးကို ယနေ့ ဩဂုတ် ၃ ရက် မွန်းလွဲ ၂ နာရီက ရန်ကုန်မြို့ မင်္ဂလာဒုံမြို့နယ်ရှိ မြို့ရွှေမန်းသား ဖိုးချစ်သဘင်ခြံမှာ ကျင်းပခဲ့ပါတယ်။
ဒီရန်ပုံငွေပွဲကိုတော့ ဩဂုတ် ၄ ရက် နေ့လယ် ၂ နာရီကနေ ညနေ ၆ နာရီအထိ ကပြဖျော်ဖြေတင်ဆက်ကြမှာဖြစ်ပါတယ်။ အဆိုပါ ဖျော်ဖြေပွဲကြီးမှာတော့ ဇော်အက၊ ရုပ်သေးအက၊ မျက်လှည့် ကိုခိုင်၊ ကျောက်ဆည် ရတနာမင်း ဆင်အက၊ သုံးပန်လှ အနုပညာပြကွက်၊ နတ်ကနား၊ နှစ်ပါးအငြိမ့်၊ မြန်မာသံကပွဲ၊ လူရွှင်တော်တွေ၊ သဘင်အငြိမ့်မင်းသမီးတွေစတာတွေ အကောင်းဆုံး ရုပ်ရှင်၊ သဘင်၊ ဂီတ ရသစုံတင်ဆက်သွားမှာဖြစ်ပါတယ်။
နှစ်ပါးသွားပိုင်းအဖြစ် ဩဂုတ် ၃ရက်မှာ မင်းဆောင်မင်းသား သူရဝင်းထွဋ်နဲ့ ဩဂုတ်လ ၄ ရက်မှာ ခေါင်းဆောင်မင်းသား ချစ်စွမ်းသာ၊ အငြိမ့်မင်းသမီး ငြိမ်းချမ်းခိုင် စတဲ့ မင်းသား၊ မင်းသမီးတွေ ကပြဖျော်ဖြေခဲ့တာ ဖြစ်ပါတယ်။ ဒီပွဲကြီး အတွက် Channel 7 က ကျပ် သိန်း ၅၀ မတည်လှူခဲ့ပြီး ဦးမိုးသူနဲ့ သရုပ်ဆောင် စပယ်မိုးက ပါဝင်ဖျော်ဖြေသူတွေ စားဖို့အတွက် ၁၀ သိန်းလှူခဲ့ပါတယ်။ ရန်ပုံငွေ သဘင်၊ ရုပ်ရှင်၊ ဂီတ ပဒေသာကပွဲကြီးကို Channel K ရုပ်သံလိုင်းကနေ တိုက်ရိုက် (Live) ထုတ်လွှင့်တင်ဆက်ပေးသွားမှာဖြစ်သလို Phoe Chit Thabin YouTube Channel ကလည်း တစ်ပြိုင်နက် တိုက်ရိုက်(Live) ထုတ်လွှင့်ပြသနေပါတယ်။
