တစ်နိုင်ငံလုံးဓာတ်အားစနစ်ချို့ယွင်းနေမှုကြောင့် မြို့နယ် အချို့တွင် ယာယီဓာတ်အား ပြတ်တောက်မှုများ ဖြစ်ပေါ်နိုင်
ဇွန် ၂၆ ရက်နေ့က တစ်နိုင်ငံလုံး ဓာတ်အားစနစ်ချို့ယွင်းမှု (System Breakdown) ဖြစ်ပွားခဲ့ပြီး ယခု တစ်နေ့လျှင် လျှပ်စစ်ပမာဏယူနစ်( ၉.၅)သန်းခန့် လျော့နည်းရရှိနေ၍ ယာယီဓာတ်အား ပြတ်တောက်မှုများ ရှိနိုင်ကြောင်း ရန်ကုန်လျှပ်စစ်ဓာတ်အားပေးရေးကော်ပိုရေးရှင်းမှ အသိပေး ထုတ်ပြန်ထားပါသည်။
နိုင်ငံတော်ဓာတ်အားစနစ်အတွင်း ဇွန် ၂၆ ရက်နေ့ (၇:၅၄) နာရီအချိန်ခန့်တွင် 230kV မန်စံ – ရွှေစာရံလိုင်း အမြဲတမ်းအပြစ် (Permanent. fault) ဖြစ်၍ တစ်နိုင်ငံလုံးဓာတ်အားစနစ်ချို့ယွင်းမှု (System Breakdown) ဖြစ်ပွားခဲ့ပါသည်။ ဓာတ်အားလိုင်း ချို့ယွင်းနေမှုကြောင့် ယနေ့အထိ နိုင်ငံတော်ဓာတ်အားစနစ်အတွင်းသို့ ရွှေလီဓာတ်အားပေးစက်များမှ လျှပ်စစ်ဓာတ်အား ထုတ်လုပ်ပို့လွှတ်နိုင်မှု (၄၀၀)မဂ္ဂါဝပ်ခန့် တစ်နေ့လျှင် လျှပ်စစ်ပမာဏယူနစ်( ၉.၅) သန်းခန့် လျော့နည်းရရှိနေပြီး နယ်မြေအခြေအနေအရ ပြုပြင်မှုများ ဆောင်ရွက်နိုင်ရန်စီစဉ်ထားဆဲဖြစ်ကြောင်း သိရသည်။
ရန်ကုန်တိုင်းဒေသကြီးအတွက် မူလလျာထားသော ဓာတ်အားပမာဏထက်.(၂၀% ) နေ့စဉ်ယူနစ် (၅.၆၄၇) သန်းခန့် လျော့နည်းရရှိခဲ့ပါသဖြင့် အရေးပေါ် ဝန်အားလျှော့ထိန်းညှိခြင်းများ ဆောင်ရွက်နေရကြောင်းလည်း သိရပါသည်။ သို့ဖြစ်ပါ၍ ရန်ကုန်တိုင်းဒေသကြီးအတွင်းရှိ စက်မှုဇုန်နှင့် အများပြည်သူများအား ယခင်ရက်ပိုင်း သုံးစွဲ၀န်အား ထက် လျော့ချ၍ ဓာတ်အားဖြန့်ဖြူးနေရပြီး အရေးပေါ်၀န်အား ထိန်းညှိမှု ဆောင်ရွက်ရခြင်းများကြောင့် မြို့နယ်အချို့တွင် ယာယီဓာတ်အား ပြတ်တောက်မှုများ ဖြစ်ပေါ်နိုင်ကြောင်း ထုတ်ပြန်ချက်အရ သိရသည်။
